Projektligji i Qeverisë, i proceduar përmes reagimeve të ministrave serbë, është paraparë të kalojë dy leximet në Kuvendin e Kosovës, me një procedurë të përshpejtuar, brenda pak ditësh, pavarësisht kundërshtimeve për qëllimet e, siç thanë ekspertët e fushës, shtetëzimit të Trepçës.
Qeveria tha se po synon që të krijojë një shoqëri aksionare me të cilën do të përfitojnë edhe vetë minatorët, duke e rimëkëmbur dhe përgatitur për treg.
Projektligji u procedua në Kuvend përmes kundërthënieve dhe ngjalli protestat në veriun e Kosovës, të minatorëve të komunitetit serb, që thanë se do të vazhdojnë të kërkojnë ndalimin e shqyrtimit të këtij ligji në Kuvend, me të cilin, siç thonë, “rrezikohet ekzistenca e tyre në Kosovë”.
Por, projektligji u pa ndryshe nga minatorët shqiptarë në pjesën jugore të qytetit, që thanë se e shohin si shpëtimin e vetëm për minierën e tyre. Madje, mos kalimi i ligjit mund të rikthejë grevat e tyre, kanë bërë me dije ata.
Qeveria e Kosovës dhe administratori i Trepçës, Agjencia Kosovare e Privatizimit, thanë se kombinati “është pasuri e Kosovës”, duke vlerësuar se Beogradi “është i vetëdijshëm se nuk ka asnjë hise në të”.
Por, të njëjtin pohim për pasurinë e shprehu edhe Beogradi zyrtar, që kërkoi “përfshirje të kësaj çështjeje, dhe siç thotë, të pasurisë së një numri ndërmarrjesh që i takojnë”, në bisedimet e Brukselit.
Opozita në Kosovë, ndërkaq, e cilësoi projektligjin si “të mangët”, sepse e përjashton “Kuvendin nga çdo rol në rastin e Trepçës”.
