Dje u zhvilluan ndeshjet e para të play-off-it në ligën më të mirë të basketbollit botëror.
Përveç Torontos, i cili humbi në fushën e vet nga Washington, favoritët tjerë arritën fitore para publikut të vet.
E udhëhequr nga veterani Paul Pierce me 20 pikë, Washington arriti të anullojë avantazhin e fushës vendase që kishte Toronto dhe fitoi 93-86. U dallua edhe Beal me 16 dhe Nene me 12 pikë, duke amortizuar kështu lojën e dobët të John Wall, i cili për 43 minuta lojë shënoi vetëm 10 pikë, me suksesshmëri katastrofale prej vetëm 27%.
Për Toronto u dallua A.Johnson me 18 dhe DeRozan me 15 pikë, kurse ylli i skuadrës Kyle Lowry shënoi vetëm 7 pikë.
Golden State vazhdon të dominojë këtë sezon, kësaj radhe viktimë ishte skuadra e fundit që siguroi play-off-in New Orleans.
Edhe pse lojtari më i mirë i tyre Anthony Davis po vazhdon të luajë mirë, është e qartë që nuk ka ndihmën e mjaftueshme të skuadrës. Ai shënoi 35 pikë por kjo nuk ishte e mjaftueshme të ndalohet skuadra më e mirë e sezonit të rregullt. Stephen Curry realizoi 34 pikë, K.Thomson 21 dhe D.Green 15 duke shtuar edhe 12 kërcime, për 106-99 në favor të Golden State.
Chicago fitoi pa probleme ndaj Milwaukee 103-91, ku u dalluan Jimmy Butler me 25 dhe Derrick Rose me 23 pikë dhe 7 asist. Lojtari malazez Nikola Mirotiq luajti vetëm 13 minuta duke shënuar 5 pikë. Për Milwaukee u dalluan K.Middleton me 18 dhe Ilyasova me 15 pikë.
Në ndeshjen ndoshta më interesante të ditës u takuan Huston dhe Dallas. Derbi teksan u fitua nga vendasit e Huston 118-108.
James Harden, edhe pse jo në nivelin e tij më të mirë, shënoi 24 pikë, i ndihmuar edhe nga T.Jones me 19 dhe veterani Terry me 16 pikë. Dallimin e bëri stoli i rezervave, ku ndihmë të madhe dhanë C.Brewer me 15 dhe Smith me 11 pikë.
Në anën tjetër, Nowitzki shënoi 24, Monta Ellis 16 dhe Rondo 15 pikë.
Rezultatet e ndeshjeve të para të play-off:
Toronto Raptors – Washington Wizards 86 – 93 (0-1)
Golden State Warriors – New Orleans Pelicans 106 – 99 (1-0)
Chicago Bulls – Milwaukee Bucks 103 – 91 (1-0)
Huston Rockets – Dallas Mavericks 118 – 108 (1-0)
