Kumtesë për opinion e Këshillit Qendror të Forcës së Re Demokratike
Këshilli Qendror i Forcës së Re Demokratike, në mbledhjen e mbajtur të premten datë 22 janar 2016, diskutoj në lidhje me kërkesën e Qeverisë së Malit të Zi dërguar Kuvendit republikan, që me datë 25 janar të vendoset në rend të ditës votëbesimi i saj.
Iniciativa e Qeverisë së Malit të Zi për votëbesim është e drejtë Kushtetuese dhe vjen pas ftesës për antarsim në NATO, i cili së bashku me antarsimin në BE është edhe prioriteti kryesor politik i Forcës. Arsyet për këtë qëndrim janë se antarsimi në këto dy struktura krijon kushtet dhe mundësitë optimale për forcimin e mëtejshëm të shtetit të së drejtës, për zhvillimin ekonomik, përmirsimin e të drejtave të popujve autokton, dhe të drejtat e njeriut në përgjithësi.
Politika e cila e çon Malin e Zi drejt antarsimit në Bashkimin Europian dhe NATO , dhe me të cilën ndërpritet ndikimi historik i lindjes, është padyshim në interes të gjithë shqiptarëve në Mal të Zi.
Retorika shqetësuese gjatë protestave të fundit,konfirmoi edhe njëherë se politika e Qeverisë së Malit të Zi në lidhje me marrëdhëniet e mira fqinjësore, posaçërisht me Kosovën dhe Shqipërinë, është në harmoni të plotë me interesat kombëtare të komunitetit shqiptar në Mal të Zi.
Në një vit zgjedhjesh, ku koha e mbajtjes së tyre varet nga dialogu politik dhe gatishmërinë e institucioneve për ti zbatuar ato në përputhje me legjislacionin e ndryshuar, besojmë se vazhdimsia politike është karakteristikë e stabilitetit të partisë.
Këshilli Qendror njëzëri vendosi që Forca ti japë besimin Qeverisë në seancën e ardhshme.
Shpresojmë që kërkesat e pandryshuara politike të Forcës, të konfirmuara me një politikë konsistente në tentativat për përmirësimin e gjendjes së shqiptarëve në Mal të Zi, do të realizohen me një dinamikë më intenzive dhe cilësore, çka deri tani nuk ishte e mundur për shkak të mosmarrveshjeve në shumicën aktuale.
Shërbimi për informim i Forcës
